Macapat iku kagunan adiluhung, warisaning para leluhur. Tumraping wong Jawa, tembang macapat ndarbeni daya prabawa lan pangaribawa kang mahanani wong bisa mbatin lan tansah eling ing piwulang kawicaksanane para leluhur. Piwulang adiluhung kang jero lan abot dadi gampang ditampa ing budi lan nyengsemake ing ati merga bisa direng-rengengake ing kekidungan. Mendah endahe yen Piwulang Dalem Gusti Yesus Sang Guru Sejati bisa dadi gampang diapalake lan mranani ati tumrap warganing Pasamuwan Suci ing Tanah Jawa iki.