Buku "Ndedrek Sang Dewi Ing Ereng-erenging Redi Merapi” menika nyariosaken gesang karohanenipun tiyang-tiyang padhusunan, ingkang miskin lan prasaja. Menggahing sadherdk padhusunan. gesang karohanen menika boten nate kapisahaken saking gesang padintenan.
Salaras kaliyan ungeling sanepa renggang gula kumepyur pulut, gesang karohanen lan gesang padintenan wau tansah nyawiji, sajiwa saraga. Pramila buku menika ngaturaken, kados pundi ing gesang padintenan ingkang kasar, wantah lan wadhag menika sumimpen brana karohanen ingkang endah lan lebet maknanipun. Buku menika nyobi ngreronce sarta ngrumpaka kaendahan wau. Gesang karohanen para sadherek padhusunan wau ugi saged suka piwucal, bilih tiyang taksih saged lan pancen kedah pitados ing Gusti, sanadyan kedah ngambah lan muk-mukan ing pepeteng. Buku menika migunani sanget langkung-langkung kangge para awam, ingkang badhe ngayati iman, ngraosaken pangajeng-ajeng lan nindakaken katresnan ing gesang padintenan, ingkang kados-kados tansah peteng lelimengan. kebak ing kasisahan lan panandhang, sarta tebih saking panglipur lan tentreming batos.